Зангиотада электрдан қарздорлик сабаб машиналар хатланди
Маълум бўлишича, фуқаронинг токдан 3 млрд сўмдан зиёд қарзи мавжуд бўлган.
Жиноят ишлари бўйича Зангиота туман судининг ижро варақасига асосан қарздор А.Т.дан ундирувчи “Ҳудудий электр тармоқлари” АЖ Тошкент ҳудудий филиали фойдасига 3.140.139.240 сўм жиноят натижасида етказилган зарар ундириш белгиланган.
Мажбурий ижро ҳаракатлари давомида қарздор А.Т.га тегишли бўлган “DAMAS-2” ва “GAZ 27527” русумли автотранспорт воситалари хатланиб, вақтинча сақлашлик учун жарима майдончасига қўйилиб, ижро ҳужжатининг ижросини таъминлаш мақсадида “E-AUKSION” савдо тизимига сотишлик учун қўйилган.
Бундан ташқари, қарздор А.Т.га тегишли бўлган Тошкент туман, Кўксарой МФЙ ҳуддуида жойлашган бино ва иншоотлари қарздорлик юзасидан хатланиб, “E-AUKSION” савдо тизимига сотиш учун қўйилган.
Шунингдек, қарздор А.Т.га тегишли бўлган Иситиш қозони хатланиб, савдо дўконига сотиш учун топширилган.
Бундан ташқари, жиноят ишлари бўйича Бўстонлиқ туман судининг ижро варақасига асосан қарздор А.Ш. дан ундирувчи “Энергосавдо” Бўстонлиқ туман бўлими фойдасига 122.517.360 сўм зарар ундириш белгиланган.
Мазкур ижро ҳужжатининг ижросини таъминлаш мақсадида, олиб борилган мажбурий ижро ҳаракатлари давомида қарздор А.Шариповга тегишли бўлган “LACETTI-2” русумли автотранспорт воситаси хатланиб, вақтинча сақлашлик учун жарима майдончасига қўйилган.
Шунингдек, давлат ижрочиси томонидан хатланган автотранспорт воситасини “E-AUKSION” савдо тизимига қўйиш чоралари олиб борилмоқда.
