Жиззахда солиқ қарзи сабаб иккита BYD хатланди
Қарздорлик бартараф этилмаган тақдирда, машиналар аукционда сотилади.
Мажбурий ижро бюросининг Пахтакор туман бўлими иш юритувидаги ижро ҳужжатлари бўйича солиқ қарздорлигини ундириш юзасидан тегишли ижро ҳаракатлари амалга оширилди. Хусусан, солиқ қарздорлиги мавжуд бўлган иккита фермер хўжалигига нисбатан мажбурий ундирув чоралари кўрилди.
Ижро ҳаракатлари давомида қарздор фермер хўжаликларига тегишли бўлган иккита BYD Song Plus Champion русумли кроссовер аниқланиб, белгиланган тартибда хатловга олинди.
Мазкур чоралар мавжуд солиқ қарздорлигини қоплаш ҳамда ижро ҳужжатлари талабларининг бажарилишини таъминлаш мақсадида амалга оширилди. Қарздорлик бартараф этилмаган тақдирда, хатланган автотранспорт воситалари қонунчиликда белгиланган тартибда баҳоланиб, электрон онлайн-аукцион савдоларига чиқарилиши мумкин.
