Поршень ва автомобиль эҳтиёт қисмлари орасидаги наркотиклар: икки киши ушланди
Сурхондарёда наркотик моддаларни автомобиль эҳтиёт қисмларига яшириб олиб кириш ва қабул қилиб олиш билан боғлиқ ҳолат фош этилди.
Давлат хавфсизлик хизмати Чегара қўшинлари, Хизматнинг Сурхондарё вилояти бўйича бошқармаси, божхона ва ички ишлар органлари ҳамкорлигида ўтказилган тезкор тадбирда наркотик моддаларни автомобиль эҳтиёт қисмларига яшириб, Ўзбекистон ҳудудига олиб кириш ҳолати аниқланди.
Маълум бўлишича, мамлакатга кириш учун «Айритом» чегара божхона постига келган, 1966 йилда туғилган Афғонистон фуқароси бошқарувидаги «Toyota» русумли автомобиль текширилган. Текширув давомида автомобиль юкхонасидаги двигатель поршени ва бошқа эҳтиёт қисмлар ичига яширилган қарийб 400 грамм опий топилган.
Шундан сўнг, мазкур фуқаронинг Термиз шаҳрида вақтинча яшаб турган хонадони ҳам кўздан кечирилган. У ердаги автомобиль эҳтиёт қисмлари ичидан яна 848 грамм опий ва 551 грамм героин аниқланган.
Кейинги тезкор тадбирлар наркотик моддаларни Ўзбекистонда қабул қилиб олиши керак бўлган шахсни аниқлашга қаратилган. Натижада Денов туманида яшовчи, 1993 йилда туғилган фуқаро Шўрчи тумани ҳудудида ашёвий далиллар билан қўлга олинган.
Мазкур ҳолат юзасидан шахсларга нисбатан Жиноят кодексининг 28 орқали 246-моддаси 2-қисми ҳамда 273-моддаси 6-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
