Иш жойида шаҳвоний шилқимликка қарши янги талаб: иш берувчилар масъул бўлади
Ўзбекистонда шаҳвоний шилқимлик тушунчасига қонуний таъриф берилди ва иш берувчиларнинг бу борадаги мажбуриятлари белгиланди.
Ўзбекистонда меҳнат ва машғулотлар соҳасида шаҳвоний шилқимликка йўл қўймаслик қонун билан мустаҳкамланди. Эндиликда иш берувчилар меҳнат жамоасида бундай ҳолатлардан холи муҳит яратиш учун барча зарур чораларни кўриши шарт.
2026 йил 13 ноябрда қабул қилинган ЎРҚ–1189-сонли қонун билан Меҳнат кодексига тегишли ўзгартириш ва қўшимчалар киритилди.
Янги нормаларга мувофиқ, меҳнат ва машғулотлар соҳасида шаҳвоний шилқимликка йўл қўйилмайди. Қонунда ушбу тушунчага ҳам аниқ таъриф берилган.
Унга кўра, шаҳвоний шилқимлик — шахс учун номақбул бўлган, унинг шаъни ва қадр-қимматини таҳқирлайдиган ҳамда шаҳвоний хусусиятга эга ҳаракатлардир.
Бундай ҳаракатларга қуйидагилар киради:
-
Шахснинг ташқи кўриниши ёки қадди-қомати ҳақида шаҳвоний мазмундаги номақбул изоҳлар бериш;
-
Шаҳвоний хусусиятга эга имо-ишоралар қилиш;
-
Шахсга номақбул тарзда жисмоний тегиниш;
-
Шаҳвоний мазмундаги чақириқ ва мурожаатлар қилиш.
Шунингдек, қонун билан иш берувчиларнинг масъулияти ҳам белгиланди. Хусусан, улар меҳнат жамоасида шаҳвоний шилқимликдан холи муҳит яратиш учун барча зарур чораларни кўриши шарт.
Мазкур талаб ходимларнинг шаъни ва қадр-қимматини ҳимоя қилиш, меҳнат муносабатларида хавфсиз ҳамда ўзаро ҳурматга асосланган муҳитни таъминлашга қаратилган.
Қонун 2026 йил 13 ноябрдан кучга кирган.
