Жисмоний шахслар ва компаниялар банкротлиги: энди махсус агентлик кузатиб боради
Махсус агентлик жисмоний шахслар ва ташкилотларнинг тўловга қобилиятсизлиги жараёнларини назорат қилади.
Ўзбекистонда жисмоний шахслар ва ташкилотларнинг тўловга қобилиятсизлиги билан боғлиқ ишларни тартибга солиш ва назорат қилиш бўйича махсус агентликнинг ҳуқуқий мақоми белгиланди.
Ҳукуматнинг 2026 йил 11 ноябрдаги 616-сон қарори билан Адлия вазирлиги ҳузуридаги Тўловга қобилиятсизлик ишлари агентлиги тўғрисидаги низом тасдиқланди.
Мазкур низом агентликнинг мақоми, асосий вазифалари, функциялари, ҳуқуқ ва мажбуриятлари ҳамда фаолиятини ташкил этиш тартибини белгилайди.
Агентликнинг асосий вазифалари қаторига тўловга қобилиятсизлик соҳасида давлат сиёсатини амалга ошириш, ушбу йўналишни назорат қилиш ва тартибга солиш киради. Шунингдек, давлат органлари ва ташкилотлари фаолиятини мувофиқлаштириш ҳам унинг зиммасига юклатилган.
Бундан ташқари, агентлик тўловга қобилиятсизлик жараёнларини тўлиқ рақамлаштириш, ортиқча бюрократик тартиб-таомилларни соддалаштириш ҳамда суд бошқарувчилари фаолиятини ташкил этиш ва назорат қилиш билан шуғулланади.
Шунингдек, жисмоний шахсларнинг тўловга қобилиятсизлиги бўйича ҳисоб ва таҳлил юритиш ҳам агентликнинг асосий вазифаларидан бири ҳисобланади.
Агентликка Президент томонидан лавозимга тайинланадиган ва лавозимидан озод этиладиган адлия вазири ўринбосари — Тўловга қобилиятсизлик ишлари агентлиги директори раҳбарлик қилади.
