Темир йўл кесишмасидаги эътиборсизлик: Damas поезд билан тўқнашди
Автомобиль ҳайдовчиси темир йўл кесишмасидаги йўл белгиси талабларига риоя қилмасдан ҳаракатланган.

2026 йил 16 ноябрь куни соат 08:20 ларда Андижон вилоятининг Асака туманидаги «Тоштепа» МФЙ ҳудудидан ўтувчи темир йўл кесишмасида Damas ва поезд иштирокида йўл-транспорт ҳодисаси содир бўлди. Бу ҳақда вилоят ИИБ ЙҲХБ ахборот хизмати хабар берди.
Маълум қилинишича, 1995 йилда туғилган В. Ж. бошқарувидаги Damas автомобили ҳайдовчиси темир йўл кесишмасидаги йўл белгиси талабларига риоя қилмасдан ҳаракатланган. Натижада у Андижон локомотив депосида машинист бўлиб ишловчи, 1993 йилда туғилган Қ. С. бошқарувидаги KME 3-4700 русумли поезд билан тўқнашган.
Ҳодиса оқибатида ҳар икки транспорт воситасига моддий зарар етган. Тан жароҳати олганлар йўқ.
Ҳозирда ҳолат юзасидан Асака тумани ИИБ ЙҲХБ ходимлари томонидан суриштирув ишлари олиб борилмоқда.








