10 дан ортиқ бола: Наманганда уйида ноқонуий ҳужра ташкил қилган шахс ушланди
У болаларга диний сабоқ бериб келган ва ҳар бир бола учун ойига 100 доллар олган.

Наманган вилоятининг Янги Наманган туманида ўз уйида ноқонуний диний мактаб ташкил этиб, 12 нафар вояга етмаган болага сабоқ берган шахс аниқланди.
Вилоят ИИБ матбуот хизматининг хабар беришича, ҳолат “Хавфсиз ва соғлом юрт” кенг қамровли тезкор-профилактик тадбирлари доирасида Ички ишлар бошқармаси ва Давлат хавфсизлик хизмати ходимлари ҳамкорлигида аниқланган.
Маълум қилинишича, 1988 йилда туғилган фуқаро ўз хонадонида санитария-гигиена талабларига риоя қилмаган ҳолда ноқонуний ҳужра ташкил этиб, болаларга диний сабоқ бериб келган.
Аниқланган 12 нафар боланинг бир нафари Самарқанд вилоятидан, уч нафари Наманган вилоятидан, саккиз нафари эса Тожикистон Республикасидан бўлган.
Гумонланувчи ҳар бир боланинг диний таълим олиши учун ойига 100 АҚШ долларидан ҳақ олган.
Ҳолат юзасидан Янги Наманган тумани ИИБ ҳузуридаги тергов бўлинмаси томонидан Жиноят кодексининг 229-2-моддаси 2-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.








