15 кунда 5 601 та баённома: автобусларда чипта тўламаслик ҳолатлари аниқланди
Тошкент вилоятига қатновчи 18 та автобус йўналишида назорат кучайтирилди.

1–15 ноябрь кунлари Тошкент вилоятига қатновчи 18 та автобус йўналишида кучайтирилган назорат тадбирлари ўтказилди. Натижада йўл ҳақини тўламасдан ҳаракатланган йўловчиларга нисбатан 5 601 та маъмурий баённома расмийлаштирилди.
Транспорт вазирлиги матбуот хизматининг хабар беришича, назорат тадбирлари “Тошкент шаҳар йўловчилар ташишни мониторинг қилиш ва назорат қилиш” давлат муассасаси инспекторлари томонидан амалга оширилган.
Назорат давомида йўловчиларга автобусга чиқишда йўл ҳақини тўлаш зарурлиги, транспорт ва банк карталари ҳамда бошқа нақдсиз тўлов усулларидан фойдаланиш тартиби, шунингдек, чиптасиз юришнинг ҳуқуқий оқибатлари ҳақида тушунтиришлар берилган.
Қоидабузарликлар энг кўп қайд этилган йўналишлар қуйидагича:
-
8Т йўналиш — 593 та;
-
145-йўналиш — 585 та;
-
194-йўналиш — 531 та;
-
65-йўналиш — 517 та;
-
74-йўналиш — 417 та.
Назорат тадбирлари Тошкент вилоятига қатновчи автобус йўналишларида давом эттирилмоқда.








