Лайк йиғиш учун машинада трюклар кўрсатди: 14 ёшли ўқувчи йўл безорилигини содир этди
Ўқувчи отасининг Lacetti автомобилини яширинча олиб чиқиб, йўлда хавфли трюклар қилган.

Қашқадарё вилоятининг Ғузор туманида 14 ёшли ўқувчи отасига тегишли Lacetti автомобилини олиб чиқиб, йўлда хавфли манёврлар қилгани акс этган видео ижтимоий тармоқларда тарқалди.
Вилоят ИИБ маълумотига кўра, ҳолат 10 ноябрь куни содир бўлган. Вояга етмаган бола автомобилни отаси уйда бўлмаган пайтда олиб чиқиб, ҳаракат давомида авария ҳолатларини юзага келтирган ва бошқа йўл ҳаракати иштирокчиларига нисбатан ҳурматсизлик қилган.
Ўқувчининг айтишича, у ёмғирли ҳавода автомобилнинг қўл тормозини тортиб, турли трюклар кўрсатган ва уларни видеога олган. Бундай ҳаракатлардан мақсади ижтимоий тармоқларда лайклар йиғиш бўлган.
Маълум бўлишича, у Ғузор туманидаги 34-мактабнинг 8-синфида таҳсил олади.
Ҳолат юзасидан боланинг ота-онасига нисбатан Маъмурий жавобгарлик тўғрисидаги кодекснинг 47-моддаси — болани тарбиялаш ва унга таълим бериш мажбуриятларини бажармаслик ҳамда 135-моддаси — тегишли ҳужжатларсиз транспорт воситасини бошқаришга йўл қўйиш бўйича маъмурий баённомалар расмийлаштирилган.
Автомобиль вақтинча сақлаш учун жарима майдончасига жойлаштирилган.








