Тошкентда ҳаво сифати яхшиланди: бугун “яшил” даража кутилмоқда
Ҳозирда атмосфера ҳавоси сифати Махсус комиссия томонидан доимий мониторинг қилинмоқда.

20 ноябрга ўтар кечаси Тошкент шаҳрида атмосфера ҳавоси сифати яхшиланди. Халқаро ҳаво сифати индекси (AQI) бўйича кечки соатларда дастлаб “сезгир гуруҳлар учун носоғлом”, кейинчалик эса “ўртача” даража кузатилди. Миллий индекс бўйича эса дастлаб “сариқ”, туннинг асосий қисмида “яшил” даража қайд этилди.
Маълум қилинишича, кечки соатларда кучсиз шамол маҳаллий ва қўшни ҳудудларда шаклланган ташламалар ҳамда PM заррачаларининг тарқалишини чеклаган. Соат 22:00 дан кейин ҳаво алмашинуви яхшиланиши натижасида PM заррачалари миқдори камайиб, ҳаво сифати яхшиланган.
Шунингдек, Экологик мониторинг миллий маркази мутахассислари Тошкент шаҳри ва Қибрай туманида ҳаво сифати бўйича инструментал ўлчовлар ўтказган.
Прогнозларга кўра, 20 ноябрь куни пойтахтда ҳаво сифати кундузги ва кечки соатларда халқаро AQI бўйича “ўртача”, миллий индекс бўйича эса “яшил” даражада бўлиши кутилмоқда.








