Сув автоматларини бузиб, пулини ўғирлашди: олти нафар гумонланувчи ушланди
Тошкентда кўчалардаги ичимлик суви сотадиган автоматлардаги пулларни ўғирлаш ҳолатлари акс этган видеолар тарқалди.

Ижтимоий тармоқларда номаълум шахсларнинг кўчаларга ўрнатилган фильтрланган ичимлик суви сотиш автоматларини бузиб, ичидаги пулларни ўғирлаётгани акс этган видеолар тарқалди.
Тошкент шаҳар Ички ишлар бош бошқармаси матбуот хизматининг маълум қилишича, ҳолатлар пойтахтнинг Учтепа ва Юнусобод туманларида содир этилган.
Кўрилган тезкор-қидирув чоралари натижасида мазкур жиноятларни содир этишда гумонланган олти нафар фуқаронинг шахси аниқланиб, улар ушланган. Улар 2004, 2007, 2008, 2010 ва 2011 йилларда туғилган шахслардир.
Мазкур ҳолат юзасидан Учтепа тумани ИИО ФМБ Тергов бўлими томонидан Жиноят кодексининг 169-моддаси (ўғирлик) билан жиноят иши қўзғатилган.
Ҳозирда гумонланувчиларнинг бошқа жиноятларга алоқадорлиги ҳам текширилмоқда. Тергов якунларига кўра қонуний қарор қабул қилиниши таъминланади.








