Ўзбекистонда ипотека кредитлари 39,5 фоизга ошди: 10 ойда 23,6 трлн сўм ажратилди
Ажратилган маблағларнинг асосий қисми бирламчи уй-жой бозорига йўналтирилган.

2026 йилнинг январь–октябрь ойларида тижорат банклари томонидан жисмоний шахсларга жами 75,8 мингта ипотека кредити ажратилди. Кредитларнинг умумий ҳажми 23,6 трлн сўмни ташкил этиб, ўтган йилнинг мос даврига нисбатан 39,5 фоизга ошди. Бу ҳақда Марказий банк маълум қилди.
Ажратилган ипотека кредитларининг асосий қисми бирламчи уй-жой бозорига йўналтирилган. Ушбу сегментда 17,4 трлн сўмлик кредит берилиб, ўтган йилнинг мос даврига нисбатан ўсиш 42 фоизни ташкил этган. Иккиламчи уй-жой бозори учун эса 6,2 трлн сўм кредит ажратилган. Бу кўрсаткич 33 фоизга ошган.
Кредитларнинг 12,2 трлн сўми эркакларга, 11,4 трлн сўми аёлларга тўғри келган. Бир йил ичида эркакларга ажратилган ипотека кредитлари ҳажми 20,9 фоизга, аёлларга ажратилган кредитлар эса 67 фоизга ошган.
Ёшлар учун ажратилган ипотека кредитлари сони 22,3 мингтага етиб, 36,5 фоизга кўпайган. Ушбу кредитларнинг умумий қиймати 7,2 трлн сўмни ташкил этган. Бу ўтган йилнинг мос даврига нисбатан 42,9 фоизга кўп.








