Президент Олимпиадаси: ёшлар 26 та спорт тури бўйича беллашади

Президент Шавкат Мирзиёев иккинчи бор ўтказилаётган Президент Олимпиадасининг очилиш маросимида иштирок этди. Давлат раҳбари спортчи ёшлар, мураббийлар ва спорт фидойиларини мусобақа бошланиши билан табриклади.

 

Бу йилги мусобақаларда Ўзбекистоннинг турли ҳудудларидан келган 3,5 мингдан зиёд ёш спортчи олимпия ва паралимпия йўналишидаги 26 та спорт тури бўйича беллашади. Уларга 1,5 минг мураббий ҳамроҳлик қилмоқда.

 

Очилиш маросимида сўзга чиққан давлат раҳбари иштирокчилар мусобақага ўз орзулари, мақсадлари ва ғалабага бўлган ишончи билан келганини таъкидлади. Шунингдек, бугунги ёш спортчилар орасидан келажакда халқаро майдонда юксак натижаларга эришадиган чемпионлар ва рекордчилар етишиб чиқишига ишонч билдирди.

 

Президент сўнгги йилларда Ўзбекистонда оммавий спортдан профессионал спортгача, иқтидорли ёшларни саралашдан халқаро мусобақаларга тайёрлашгача бўлган яхлит тизим шакллантирилганини қайд этди. Бу ишлар ёшларни соғлом, иродали ва мустақил фикрлайдиган инсонлар этиб тарбиялашга қаратилганини билдирди.

 

Келтирилишича, сўнгги ўн йил ичида ўзбекистонлик спортчилар йирик халқаро мусобақаларда жами 5 518 та медаль қўлга киритган. Шундан 1 675 таси олтин медаль бўлиб, бу кўрсаткич аввалги ўн йилликка нисбатан уч баравар кўп. Медалларнинг учдан бир қисми спортчи қизлар ҳиссасига тўғри келади.

 

Шунингдек, Самарқандда ўтказилган Бутунжаҳон шахмат олимпиадасида Ўзбекистон эркаклар терма жамоасининг иккинчи бор ғолиб бўлгани мамлакат шахмат тарихидаги муҳим натижалардан бири сифатида қайд этилди.