300 млн сўмлик жарима билан қўрқитиб, 4 минг доллар сўраган электрчилар ушланди
Наманганда 2 нафар электр ходими далолатнома расмийлаштирмаслик эвазига пул талаб қилган.
Наманган шаҳрида “Ҳудудий электр тармоқлари” АЖ «Энергосавдо» филиали Янги Наманган тумани бўлими бошлиғи ва устаси пора олаётган вақтида ушланди. Бу ҳақда Бош прокуратура ҳузуридаги Департамент хабар берди.
Маълум қилинишича, Департаментнинг Наманган шаҳар бўлими ходимлари томонидан ўтказилган тезкор тадбирда бўлим бошлиғи Ф.А. ва уста A.A. қўлга олинган.
Терговга кўра, улар ўзаро тил бириктириб, фуқаро Б.К.нинг «Гўзал» МФЙ ҳудудидаги нотурар биносига ўрнатилган электр ҳисоблагич носоз эканини айтган. Агар бу ҳолат бўйича далолатнома расмийлаштирилса, фуқарога 300 миллион сўм жарима ёзилишини билдирган. Далолатнома тузмаслик эвазига эса 4 минг АҚШ доллари талаб қилган.
Тезкор тадбир давомида ходимлар сўралган пулнинг 2 500 долларини олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) ва 212-моддаси (пора олиш-беришда воситачилик қилиш) билан жиноят иши қўзғатилган. Ҳозирда тергов ҳаракатлари олиб борилмоқда.
