Тошкентда қиз ўзини каналга ташлади: инспекторлар уни қутқариб қолди
У шифохонага етказилгани, ҳозирда аҳволи барқарорлиги билдирилди.
Тошкент шаҳридаги Бўзсув каналига ўзини ташлаган қиз профилактика инспекторлари ва воқеа гувоҳи бўлган фуқаро ёрдамида қутқариб қолинди. У шифохонага етказилган, ҳозирда аҳволи барқарор.
Пойтахт ИИББ хабарига кўра, воқеа Бўзсув каналининг аҳоли сайр қилиши учун мўлжалланмаган ёпиқ қисмида содир бўлган. Шу ҳудудда бўлган фуқаро қизнинг сувга сакраганини кўриб, зудлик билан “102” хизматига мурожаат қилган.
Хабар келиб тушгач, Яккасарой тумани Тепа маҳалласига бириктирилган профилактика инспекторлари воқеа жойига етиб борган. Қидирув давомида қиз кучли сув оқими ва айланма ҳаракатлар сабаб каналнинг чекка қисмига оқиб бориб қолганини аниқлашган.
Шундан сўнг профилактика инспектори Ортиқ Омонов сувга тушиб, қизни қутқаришга киришган. Иккинчи ходим Қудрат Расулов эса уни сувдан чиқариб олишга ёрдам берган.
Қутқарилган қизга воқеа жойида биринчи ёрдам кўрсатилган. У кўп миқдорда сув ютиб юборгани сабабли қайт қилган. Кейинчалик 5-сонли шаҳар шифохонасига олиб борилган.
Тиббий ёрдамдан сўнг қизнинг шахси аниқланиб, Тошкент вилоятининг Янгийўл туманида яшовчи ота-онаси билан боғланилган. Қиз шифохонадан кейин ота-онасига топширилган. Ҳозирда унинг аҳволи барқарор экани маълум қилинди.
