“Оғир моддий аҳволга тушиб қолган”: она ва фарзандлари Ўзбекистонга қайтарилди
Аёл Хабаровскда Россияда бўлиш қоидаларини бузганлиги сабабли ҳуқуқни муҳофаза қилувчи органлар томонидан тўхтатилган.
Россиянинг Хабаровск шаҳрида тўрт нафар вояга етмаган фарзанди билан оғир вазиятга тушиб қолган ўзбекистонлик аёл ватанга қайтарилди.
“Дунё” ахборот агентлигининг хабар беришича, Россиянинг Узоқ Шарқ минтақасидаги Владивосток ва Хабаровск шаҳарларида вақтинчалик меҳнат фаолияти давомида оғир моддий аҳволга тушиб қолган бир гуруҳ Ўзбекистон фуқароларига ёрдам кўрсатилди.
Хусусан, Хабаровск шаҳрида тўрт нафар вояга етмаган фарзанди билан мушкул вазиятда қолган ўзбекистонлик аёлнинг муаммоси ҳал этилган.
Маълум қилинишича, аёл Россияда бўлиш қоидаларини бузганлиги сабабли маҳаллий ҳуқуқни муҳофаза қилувчи органлар томонидан тўхтатилган. Суд қарорига кўра, уни мамлакатдан депортация қилиш ва жўнатиб юборилгунига қадар чет эл фуқароларини вақтинча сақлаш марказига жойлаштириш белгиланган.
Ўзбекистоннинг Бош консулхонаси ва Миграция агентлиги томонидан кўрилган тезкор чоралар натижасида аёл ҳамда унинг фарзандларининг Ўзбекистонга хавфсиз қайтиши таъминланган.
