Тошкентда ҳаво сифати: 2 ноябрь куни эрталаб яхшиланиши кутилмоқда
2 ноябрга ўтар кечаси ҳаво сифати АQI бўйича «носоғлом», миллий индекс бўйича эса «зарғалдоқ» даражага етиши мумкин.
2 ноябрга ўтар кечаси Тошкентда ҳаво сифати Халқаро ҳаво сифати индекси (АQI) бўйича «носоғлом», миллий индекс бўйича эса «зарғалдоқ» даражада бўлиши кутилмоқда.
Қайд этилишича, ҳароратнинг пасайиши, шамолнинг сустлиги ва кучли ҳарорат инверсияси атмосферанинг қуйи қатламларида ҳаво алмашинувини чеклайди. Натижада PM2.5 ва PM10 заррачалари ер юзасига яқин қатламда тўпланиши мумкин.
Шунингдек, ҳаво массаларининг сўнгги суткада шаҳар атрофида секин ҳаракатлангани ҳам ифлослантирувчи моддалар тарқалишини қийинлаштирмоқда.
Прогнозларга кўра, 2 ноябрь куни қуёш чиққач, ҳарорат кўтарилиши ва вертикал ҳаво алмашинуви яхшиланиши ҳисобига ҳаво сифати ҳам яхшиланиши мумкин.
