“Миллий фильмларимиз талабга жавоб беряптими? Афсуски, йўқ” — Президент

 

Президент Шавкат Мирзиёев янги даврда яратилган тарихий фильмлар ҳақида тўхталди. Улар орасида «Исломхўжа», «Ибрат», «Авлоний», “Абдулла Қодирий”, “Қўқон шамоли”, «Муқимий», «Илҳақ», “Ўзбек қизи” ва “Баҳодир Ялангтўш” каби асарлар бор. Давлат раҳбари миллий кадрларнинг янги авлоди шаклланишида киноижодкорлар муносиб ҳисса қўшганини қайд этди.

 

Шунингдек, “Олтин глобус” халқаро кино мукофоти тарихида Марказий Осиё ва Кавказ киноижодкорларини тақдирлаш маросими илк бор Тошкентда ўтказилгани таъкидланди. Учрашувда иштирок этаётган актриса Гулчеҳра Жамилова «Меридиан» мукофотига сазовор бўлди.

 

Шу билан бирга, Президент миллий кино санъатини янги босқичга олиб чиқиш учун ҳали кўп иш қилиш кераклигини айтди.

 

Давлат раҳбари ижтимоий тармоқлар ривожлангани сабаб одамлар кинотеатрларга бормай қўйгани ҳақидаги фикрларга муносабат билдирди. Унинг таъкидлашича, хорижий фильмлар намойиш этилаётган кинотеатрлар томошабинлар билан тўлмоқда.

 

“Демак, томошабин кинодан, кинотеатрларга боришдан воз кечгани йўқ, фақат унинг диди ва талаби ўзгарди. Миллий фильмларимиз ана шу талабга жавоб беряптими? Афсуски, йўқ!” — деди Президент.

 

Бунинг сабабларидан бири фильмларни ишлаб чиқаришдан тортиб, уларни томошабинга етказишгача бўлган яхлит тизим — дистрибуция шаклланмаганидир.

 

Шунингдек, Президент профессионал кинотанқидчилар фикри билан етарлича ҳисоблашилмаётганини қайд этди. Унинг айтишича, холис таҳлил ижодкорларга камчиликларини кўриш ва маҳоратини ошириш имконини беради.

 

Кино лойиҳаларини молиялаштиришдаги давлат буюртмаси ва хариди тизимида ҳам муаммолар бор. Президентнинг таъкидлашича, аввалдан шаклланган «госзаказ» тизими замонавий киноиндустрия талабларига жавоб бермаяпти.

 

Маълум қилинишича, бир вақтнинг ўзида битта режиссёрга олтитагача, бир муаллифга эса еттитагача лойиҳа бириктирилган. Бундай юклама ҳар бир асар устида пухта ишлашни қийинлаштиради. Буюртмаларнинг деярли ярми давлат студияларига берилгани эса хусусий ижодкорлар учун тенг рақобат имкониятларини чеклаган.

 

Натижада кучли сценарий ва сифатли фильм яратиш ўрнига топшириқни тезроқ якунлаш асосий мезонга айланиб қолган. Президент ижодкор меҳнатининг натижаси томошабинни чуқур ўйга соладиган ва унинг қалбида из қолдирадиган фильм билан ўлчаниши кераклигини таъкидлади.

 

Шунингдек, сценарий суратга олиш жараёнида бойитилиши, ижодий ечимлар эса ўзгариши мумкинлиги қайд этилди. Шу сабабли санъат асарини оддий товар ёки қурилиш объекти каби техник топшириқлар асосида харид қилиш тўғри эмаслиги кўрсатиб ўтилди.