Конгода Эбола билан касалланганлар сони 10 мингдан ошди: 4887 киши вафот этди
Вирус Уганда, Нигерия ва Кения каби бошқа Африка давлатларида ҳам қайд этилган.
Конго Демократик Республикасида Эбола вирусини юқтирганлар сони 10060 нафарга етди, 4887 киши вафот этди. Бу мамлакат тарихидаги энг тез тарқалаётган ва энг кўп ўлимга сабаб бўлган Эбола эпидемиясидир.
Мамлакат Соғлиқни сақлаш вазирлиги маълумотларига кўра, янги ҳолатларнинг қарийб 80 фоизи соғлиқни сақлаш идоралари кузатаётган маълум юқиш занжирларига кирмайди. Касаллик саккизта вилоятдаги 66 та тиббий ҳудудда қайд этилган.
Эпидемия қўшни давлатларга ҳам тарқалган. Угандада Конго Демократик Республикасидан қайтаётган фуқаролар учун 21 кунлик карантин жорий этилган. Нигерияда аэропортларда текширув кучайтирилган, Швейцарияда эса Угандада вирус юқтирган аёл даволанишга олинган. Кенияда Эбола билан касалланишнинг тўққизта ҳолати тасдиқланган, улардан икки нафари вафот этган.
Эпидемияга Бундибугё вируси сабаб бўлмоқда. Унга қарши ҳозирча тасдиқланган вакцина ёки даволаш усули йўқ. Жаҳон соғлиқни сақлаш ташкилоти ушбу вирусга қарши вакцинанинг илк клиник синови бошланганини билдирган.
