Кино соҳасини ривожлантириш: соҳада иккита янги тузилма ташкил этилади

Ўзбекистонда киношунослик, профессионал танқидчилик ва миллий кино саноатини ривожлантиришга қаратилган янги ташаббуслар илгари сурилди. Жумладан, Киношунослар клуби ва Ўзбекистон кино соҳаси вакиллари палатасини ташкил этиш, шунингдек, кино ишлаб чиқаришда сунъий интеллект имкониятларидан фойдаланиш режалаштирилмоқда.

 

Янги Киношунослар клуби фаолиятини “Ўзбекфильм” миллий кинокомпанияси қўллаб-қувватлайди. Шунингдек, клубнинг Халқаро кинотанқидчилар федерацияси (FIPRESCI)га аъзо бўлишига кўмаклашилади. Бу миллий фильмларнинг нуфузли халқаро фестивалларда иштирокини кенгайтиришга хизмат қилиши кутилмоқда.

 

Бундан ташқари, Ўзбекистон Кино арбоблари ва Ўзбекистон кино саноати вакиллари уюшмаларини бирлаштириш орқали Ўзбекистон кино соҳаси вакиллари палатаси ташкил этилади. Палата ижодкорларнинг муаллифлик ҳуқуқлари ва касбий манфаатларини ҳимоя қилиш, соҳада ўзини ўзи бошқаришни ривожлантириш ҳамда ёш мутахассисларнинг профессионал ўсишига кўмаклашиш билан шуғулланади.

 

Ёш киноижодкорларнинг хорижда малака ошириши ва янги палата фаолиятини молиявий-ташкилий жиҳатдан қўллаб-қувватлаш ҳам белгиланган. Палата фаолиятини ташкил этиш ишларини бир ой муддатда якунлаш топширилган.

 

Кино ишлаб чиқаришда сунъий интеллектдан фойдаланилади

 

Миллий кино саноатини янги технологик ривожланиш босқичига олиб чиқиш мақсадида кино яратишда сунъий интеллект имкониятларидан кенг фойдаланиш бўйича ҳамкорлик дастури ишлаб чиқилади. Ҳужжатни бир ой ичида тайёрлаш режалаштирилган.

 

Дастурда янги таълим дастурларини ишлаб чиқиш, мутахассисларни ўқитиш ва уларнинг хорижда малакасини ошириш масалалари ҳам назарда тутилади.

 

“Ўзбекфильм” ягона миллий брендга айлантирилади

 

Шунингдек, “Ўзбекфильм” номини миллий кино саноатининг ягона бренди сифатида мустаҳкамлаш таклиф этилди. Хусусан, Чилонзор ҳудудининг бир қисми халқ орасида азалдан “Ўзбекфильм” номи билан аталиб келаётгани қайд этилиб, ҳозирги Чилонзор кўчасининг тегишли қисмига шу номни бериш ташаббуси илгари сурилди.

 

Бундан ташқари, Кино санъати музейини “Ўзбекфильм” музейи, Кино санъати саройини “Ўзбекфильм” киносаройи, Миллий кинофондни эса “Ўзбекфильм” миллий кинофонди деб номлаш таклиф қилинди. Ушбу муассасаларни ягона бренд остида бирлаштириш кўзда тутилмоқда.

 

Очиқ мулоқот якунида миллий кинони ривожлантиришнинг муҳим йўналишлари белгилаб олингани ва таклиф этилган ўзгаришларни назарда тутувчи фармон имзолангани маълум қилинди.

 

Президент ижодкорларнинг ташаббуслари қўллаб-қувватланишини таъкидлаб, сифатли фильмлар яратиш учун шароит билан бирга ҳалол меҳнат, ватанпарварлик ва халқни севиб ижод қилиш муҳимлигини қайд этди.