«Бировга чоҳ қазисанг, ўзинг тушасан» — Путин Европа Иттифоқининг Россия газидан воз кечиш қарори ҳақида

Россия президенти Владимир Путин Европа давлатларининг Россия газидан воз кечиши хорижий истеъмолчилар учун харажатларнинг кескин ошишига олиб келишини айтди. Унинг таъкидлашича, Россияни жаҳон газ бозоридан четлаштириш ва мамлакат газ саноатининг ривожланишини чеклашга қаратилган уринишлар жиддий оқибатларга сабаб бўлади. Бу ҳақда Путин газ экспорт қилувчи мамлакатлар форумидаги чиқиши чоғида маълум қилди, деб ёзди РБК.

 

Путиннинг таъкидлашича, Россия жаҳон газ бозорининг асосий иштирокчиларидан бири ҳисобланади. Мамлакат табиий газ захиралари бўйича дунёда биринчи, қазиб олиш ҳажми бўйича эса иккинчи ўринда туради. Шу билан бирга, Россия газ компаниялари сўнгги йилларда муайян қийинчиликларга дуч келган.

 

«Россияни жаҳон газ бозори иштирокчилари сафидан чиқаришга, мамлакатимизда ушбу соҳанинг ривожланишини чеклашга қаратилган ҳар қандай уриниш жиддий оқибатларга олиб келади. Энг аввало, бу газнинг хорижий якуний истеъмолчилари — компаниялар, корхоналар ва уй хўжаликлари учун харажатларнинг ҳаддан ташқари ошишида намоён бўлади», — деди Россия президенти.

 

Путин Европани Россия энергия ресурсларидан воз кечиш ва узоқ муддатли шартномаларни бекор қилиш орқали ўз сиёсати, саноати ҳамда ижтимоий соҳасига зарар етказаётганликда айблади.

 

«Бировга чоҳ қазисанг, ўзинг тушасан», — деди у  вазиятни изоҳлар экан.

 

Россия раҳбарининг фикрича, жаҳон газ саноати олдида турган вазифаларни ҳал қилиш учун янги тўсиқлар яратиш эмас, аксинча, ҳамкорликни, биринчи навбатда, газ экспорт қилувчи мамлакатлар ўртасидаги алоқаларни мустаҳкамлаш зарур.

 

Путин бундай ҳамкорлик давлатларнинг ўз имкониятлари ва суверен технологияларига таяниши, шунингдек, ўзаро манфаатдорлик, ишонч ва бир-бирининг манфаатларини ҳурмат қилиш тамойиллари асосида ривожланиши кераклигини таъкидлади.