2,45 млрд долларлик режа: Трампнинг Тинчлик кенгаши Ғазони тиклаш дастурини тақдим этди

 

АҚШ президенти Доналд Трамп ташаббуси билан тузилган Тинчлик кенгаши Ғазо секторини тиклаш бўйича дастлабки олти ойлик режани тақдим этди. 66 та лойиҳани ўз ичига олган дастур учун 2,45 миллиард доллар керак бўлади.

 

Режа БМТ Бош Ассамблеяси доирасида Нью-Йоркда ўтказилган йиғилишда тақдим этилди. Унда Ғазодаги инфратузилмани тиклаш, таълим ва соғлиқни сақлаш тизимини қўллаб-қувватлаш, иқтисодий фаолиятни қайта йўлга қўйиш ҳамда хавфсизликни таъминлашга қаратилган лойиҳалар ўрин олган.

 

Дастлабки босқичда вайроналарни тозалаш, портламаган ўқ-дориларни зарарсизлантириш, вақтинчалик бошпаналар қуриш, шифохоналарни таъмирлаш, электр ва сув таъминотини тиклаш, йўллар ҳамда чегара ўтиш пунктларини қайта тиклаш кўзда тутилган. Шунингдек, халқаро барқарорлаштириш кучларини жойлаштириш ва янги Ғазо полициясини тайёрлаш билан боғлиқ лойиҳалар ҳам мавжуд.

 

Тинчлик кенгаши Ғазони тўлиқ қайта тиклаш кўпроқ маблағ талаб қилишини қайд этган. Режага кўра, ҳудуддаги жисмоний инфратузилмани ўрта муддатда тиклаш қиймати 35,2 миллиард доллар, кейинги ўн йилликдаги тўлиқ тикланиш эҳтиёжи эса 71,4 миллиард долларга баҳоланмоқда.

 

Кенгаш маълумотига кўра, донор давлатлар томонидан аввал 17 миллиард доллар маблағ ваъда қилинган, бироқ ҳозиргача унинг 280 миллион доллари ўтказилган. Шу сабабли ташкилот халқаро ҳамкорларни дастлабки лойиҳаларни молиялаштиришга чақирмоқда.

 

Тинчлик кенгаши вакиллари дастур амалга оширилишида бир қатор муаммолар мавжудлигини ҳам тан олган. Жаред Кушнер режа турли масалалар сабаб кечикишларга дуч келаётганини айтган. Кенгашнинг Ғазодаги лойиҳаларни амалга ошириши Исроил ва Ҳамаснинг келишувларни бажариши, шунингдек, хавфсизлик ва бошқарув масалаларидаги келишувларга боғлиқ бўлиб қолмоқда.