903 та дрон ва 4 та “Нептун” ракетаси: Россия бир кунлик ҳисоботни эълон қилди
Сўнгги 24 соатда Украина дронлари, “Нептун” ракеталари ва бошқариладиган авиабомбалар уриб туширилган.
Россия Мудофаа вазирлиги сўнгги 24 соат ичида мамлакат ҳаво мудофааси тизимлари Украина Қуролли Кучларига тегишли 903 та самолёт типидаги дронни уриб туширганини билдирди.
Вазирлик маълумотларига кўра, шу вақт ичида тўртта узоқ масофага учувчи «Нептун» ракетаси ва иккита бошқариладиган авиабомба ҳам йўқ қилинган.
Шунингдек, Россия кучлари Украина Қуролли Кучларининг ўқ-дори омборлари, учувчисиз учиш аппаратлари ва ер усти робот тизимлари сақланадиган ҳамда ишлаб чиқариладиган объектларига зарба бергани айтилган. Бундан ташқари, радар станцияси ҳам йўқ қилинган.
Ҳарбий амалиётларда оператив-тактик авиация, ҳужумкор дронлар, ракета қўшинлари ва артиллерия иштирок этган. Вазирлик ҳисобот даврида 139 та тумандаги Украина бўлинмаларининг вақтинчалик жойлашув пунктларига ҳам зарбалар берилганини маълум қилган.
