48 соатда 12 давлат билан мулоқот: Эрон вазири минтақадаги вазиятни муҳокама қилди
Ароқчи Уммон, Миср, Туркия, Саудия Арабистони ва бошқа 8 давлат ташқи ишлар вазирлари билан маслаҳатлашув ўтказди.
Эрон ташқи ишлар вазири Аббос Ароқчи сўнгги 48 соат ичида 12 мамлакат ташқи ишлар вазирлари билан телефон орқали алоҳида суҳбатлар ўтказди. Мулоқотларда минтақадаги вазият ва АҚШ ҳамда Исроилнинг кескинликни кучайтириши мумкин бўлган ҳаракатлари оқибатлари муҳокама қилинди.
Ароқчи бу ҳақда Instagram'даги саҳифасида маълум қилган. Унинг ёзишича, Уммон, Миср, Иордания, Саудия Арабистони, Қатар, Кипр, Туркия, Қувайт, Бирлашган Араб Амирликлари, Тунис, Ироқ ва Покистон ташқи ишлар вазирлари билан суҳбатлашган.
Эрон ташқи ишлар вазирининг таъкидлашича, маслаҳатлашувларда давлатларнинг миллий суверенитетини ҳурмат қилиш, тажовуз ва таҳдидларга чек қўйиш ҳамда ташқи кучларнинг минтақага вайронкор аралашувига йўл қўймаслик зарурлиги қайд этилган.
Шунингдек, у минтақавий давлатларнинг беқарорлик янада кенгайишининг олдини олишдаги масъулиятини таъкидлаган.
Ароқчи Эроннинг ўз суверенитети ва миллий хавфсизлигини ҳимоя қилишга қонуний ҳуқуқи борлигини, минтақавий хавфсизлик механизмлари эса минтақадан ташқари кучларнинг аралашувисиз шакллантирилиши кераклигини билдирган.
