Украина донни Болтиқбўйи орқали экспорт қилмоқчи: 2 млрд долларгача маблағ керак
Ушбу йўналишдан фойдаланиш бир тонна Украина ғалласини ташиш харажатини қарийб 100 долларга оширади.
Украина қишлоқ хўжалиги маҳсулотларини Болтиқбўйи мамлакатлари портлари орқали экспорт қилиш имкониятларини кўриб чиқмоқда. Бироқ бу йўналишдаги асосий муаммо логистика харажатларининг юқорилиги бўлиб қолмоқда.
Бу масала 23 сентябрь куни Украина аграр сиёсат ва озиқ-овқат вазири Тарас Висотский ҳамда Эстония минтақалар ва қишлоқ хўжалиги ишлари вазири Ҳендрик Ёханнес Террас ўртасидаги учрашувда муҳокама қилинган.
Висотскийнинг таъкидлашича, Украина қишлоқ хўжалиги маҳсулотлари экспортининг 70 фоизга яқини ташқи бозорларга йўналтирилади. Урушдан олдин экспортнинг 90 фоиздан ортиғи Қора денгиз портлари орқали амалга оширилган.
Украина томони Россия ҳужумлари сабаб фуқаролик кемалари ва порт инфратузилмаси учун хавфлар ортганини билдирган. Шу сабабли мамлакат муқобил экспорт йўналишларини ривожлантирмоқда.
Ҳозирда муқобил йўналишлар Украина учун зарур бўлган қишлоқ хўжалиги маҳсулотлари экспортининг қарийб 44 фоизини таъминламоқда. Украина бу кўрсаткични, хусусан, Болтиқбўйи портларидан фойдаланиш ҳисобига 50 фоизгача оширишни режалаштирмоқда.
Бироқ Болтиқбўйи йўналишининг асосий камчилиги — юқори логистика харажатлари. Ушбу йўналишдан фойдаланиш бир тонна Украина ғалласини ташиш харажатини қарийб 100 долларга оширади. Шу сабабли украиналик фермерлар Гданьск, Клайпеда ёки Гамбург портлари орқали транзит харажатларини мустақил равишда қоплаш имконига эга эмас.
Украина ҳисоб-китобларига кўра, Болтиқбўйи портлари орқали йилига 20 миллион тоннагача дон экспорт қилиш мумкин. Қўшимча логистика харажатларини қоплаш учун эса 1,5–2 миллиард доллар миқдорида маблағ зарур.
Украина бу харажатларнинг бир қисмини қоплаш учун Европа Иттифоқи ва бошқа халқаро ҳамкорлардан молиявий ёрдам сўраб мурожаат қилган.
