Ҳарбийлар ҳалок бўлди: Қозоғистонда 25 сентябрь миллий мотам куни деб эълон қилинди
Манғистов вилоятида ҳарбий машғулотлар вақтида 19 нафар ҳарбий сувга оқиб кетиб, улардан 12 нафари ҳалок бўлди.
Қозоғистон президенти Қосим-Жўмарт Тўқаев Манғистов вилоятидаги ҳарбий машғулотлар вақтида ҳарбий хизматчилар ҳалок бўлгани муносабати билан 25 сентябрни мамлакатда миллий мотам куни деб эълон қилди. Бу ҳақда Президент матбуот хизмати маълум қилди.
Давлат раҳбарининг фармойишига кўра, хизмат бурчини бажариш вақтида ҳарбийлар ҳалок бўлгани сабабли 2026 йил 25 сентябрь куни Қозоғистон Республикасида миллий мотам куни ўтказилади.
24 сентябрь куни Манғистов вилоятида Қозоғистон Қуролли кучлари Ҳарбий-денгиз кучларининг машғулотлари ўтказилаётган эди. Каспий денгизи соҳилида жанговар тайёргарлик топшириғини бажараётган 19 нафар ҳарбий кучли шамол ва об-ҳавонинг кескин ёмонлашуви сабаб сув оқимига тушиб кетган.
Қозоғистон Мудофаа вазирлиги дастлаб тўққиз нафар ҳарбий ҳалок бўлгани, уч нафари қутқарилганини маълум қилган. Кейинги маълумотларга кўра, қурбонлар сони 12 нафарга етган.
Қозоғистон Бош прокуратураси ҳодиса юзасидан жиноят иши қўзғатилганини ва тергов ҳаракатлари олиб борилаётганини билдирди. Фожиа сабабларини аниқлаш учун ҳукумат комиссияси ҳам тузилган. Бош вазир ўринбосари Қанат Бозумбаев ҳодиса жойига борган.
Қосим-Жўмарт Тўқаев ҳалок бўлган ҳарбийларнинг яқинларига ҳамдардлик билдирган ва фожиа сабабларини атрофлича тергов қилишни топширган.
Ҳодиса муносабати билан Оқтов шаҳрида «Шаҳар куни» доирасида ўтказилиши режалаштирилган барча байрам тадбирлари ҳам бекор қилинган.
