Ўзбекистонда иш ҳақи ошди: ўртача маош 7,1 млн сўмга етди
Энг юқори реал иш ҳақи ўсиши Жиззах вилоятида, энг юқори ўртача маош эса молия ва суғурта соҳасида қайд этилди.
Ўзбекистонда 2026 йилнинг январь–июнь ойларида номинал иш ҳақи ўтган йилнинг мос даврига нисбатан 18,4 фоизга, реал иш ҳақи эса 10,9 фоизга ошди. Бу ҳақда Марказий банкнинг 2026 йил II чораги бўйича Меҳнат бозори шарҳида маълум қилинди.
Қайд этилишича, реал иш ҳақининг 10,9 фоизга ўсиши сўнгги йиллардаги энг юқори кўрсаткич бўлган. Марказий банк буни, асосан, нархлар ўсишининг секинлашиши билан изоҳлаган.
Ҳудудлар кесимида реал иш ҳақининг энг юқори ўсиши Жиззах вилоятида қайд этилган — 13,3 фоиз. Наманган вилоятида бу кўрсаткич 11,8 фоизни, Тошкент шаҳрида эса 10,7 фоизни ташкил этган.
Реал иш ҳақининг энг паст ўсиши Андижон вилояти — 7,9 фоиз ва Қорақалпоғистон Республикасида — 8,6 фоиз қайд этилган.
Тармоқлар бўйича энг юқори ўртача иш ҳақи молия ва суғурта соҳасига тўғри келган — 19,1 млн сўм. Ахборот ва коммуникация хизматларида ўртача иш ҳақи 17,4 млн сўмни ташкил этган.
Энг паст ўртача иш ҳақи қишлоқ хўжалигида — 3,5 млн сўм, ижтимоий хизматларда эса 4,7 млн сўм бўлган.
Иш ҳақининг ўсиш суръати ташиш ва сақлаш соҳасида 22,8 фоиз, ижтимоий хизматларда 20,2 фоиз, қурилишда эса 19,9 фоизни ташкил этган.
Марказий банк қурилиш, саноат, ташиш ва сақлаш соҳаларида иш ҳақи ўсишининг тезлашишини меҳнатга талабнинг юқорилиги ҳамда малакали кадрлар учун рақобатнинг кучайиши билан изоҳлаган.
Шунингдек, 2026 йил 1 июнь ҳолатига Ўзбекистонда фаолият юритаётган корхона ва ташкилотлар сони 471 мингтага етган. Бу кўрсаткич йил бошига нисбатан 7,2 фоизга кўп.
