Махфий учрашув: Трамп маъмурияти Эрон масаласини муҳокама қилди

АҚШ президенти Дональд Трамп маъмуриятининг юқори лавозимли амалдорлари Кемп-Девидда Эрон билан боғлиқ можаронинг кейинги босқичлари ҳамда Ямандаги вазиятни муҳокама қилиш учун бир неча соат давом этган ёпиқ учрашув ўтказди. Бу ҳақда Ахios уч нафар америкалик амалдорга таяниб хабар берди.

Учрашув АҚШ маъмурияти томонидан расман эълон қилинмаган. Ахios манбаларига кўра, йиғилишга АҚШ вице-президенти Ж. Д. Венс раислик қилган.

Унда Давлат котиби Марко Рубио, Мудофаа вазири Пит Хегсет, Оқ уйнинг махсус вакили Стив Уиткофф, Марказий разведка бошқармаси директори Жон Ратклифф ҳамда АҚШ Қуролли кучлари штаб бошлиқлари қўмитаси раиси генерал Ден Кейн иштирок этган.

Учрашувда Эрон билан боғлиқ вазиятнинг кейинги ривожи ва Саудия Арабистони билан Ямандаги ҳутийлар ўртасидаги қарама-қаршилик муҳокама қилинган. Ахios суҳбатдошларидан бири маъмуриятнинг Яқин Шарқдаги вазият бўйича музокаралари юзасидан айрим қарорлар қабул қилинган ёки муҳим масалалар чуқур муҳокама қилинганини билдирган.

Ахios қайд этишича, бундай форматдаги аввалги учрашув 2025 йил июнь ойида, Исроилнинг Эронга қарши ҳарбий операцияси бошланишидан бир неча кун олдин ўтказилган.

Шунингдек, Саудия Арабистони Ямандаги ҳутийларга қарши режалаштирилаётган ҳарбий амалиётда АҚШнинг иштирок этишини сўрамоқда. Хусусан, Риёз Вашингтондан ҳутийлар позицияларига ҳаво зарбалари беришда ёрдам кутаётгани айтилмоқда.

Ахios маълумотларига кўра, Трамп ҳозирча ҳутийларга қарши ҳаво ҳужумларида иштирок этишга эҳтиёткорлик билан ёндашмоқда. Бироқ АҚШ расмийлари президентнинг позицияси кейинчалик ўзгариши мумкинлигини билдирган. Саудия Арабистони эса ҳутийларга қарши кенг кўламли амалиётга тайёргарлик кўраётгани ҳақида Reuters ҳам хабар берган.