АҚШ Эронга янги зарбалар беришга тайёрланмоқда: эҳтимолий сана маълум қилинди
Оқ уйда 4–5 ноябрь кунлари Дональд Трамп ва миллий хавфсизлик жамоаси Эронга зарбаларни қайта бошлаш масаласини муҳокама қилган.
АҚШ маъмурияти Эронга қарши ҳарбий зарбаларни 9 ноябрь куни қайта бошлаш имкониятини кўриб чиқмоқда. Бу ҳақда Fox News телеканали маъмуриятдаги манбаларга таяниб хабар берди.
Телеканал суҳбатдошларига кўра, 9 ноябрь куни янги ой сабабли тунда ой ёруғлиги деярли бўлмайди. Ҳарбий амалдорлар бундай шароит операция ўтказиш учун қулай бўлиши мумкинлигини билдирган.
Манбаларнинг айтишича, Оқ уйда 4–5 ноябрь кунлари президент Дональд Трамп ва унинг миллий хавфсизлик бўйича жамоаси ўртасида Эронга зарбаларни қайта бошлаш масаласи муҳокама қилинган.
Fox News маълумотига кўра, АҚШ Марказий қўмондонлиги (CENTCOM) Эронда йирик ҳарбий операцияларни қайта бошлашга тайёргарликни якунламоқда. Бироқ Вашингтондан янги кўрсатма олгани ҳақида маълумот йўқ.
Аввалроқ Дональд Трамп Эронга нисбатан учта эҳтимолий йўлни кўриб чиқаётгани хабар қилинганди: янги зарбалар бериш, Теҳронга иқтисодий босимни давом эттириш ёки келишувга эришиш.
Эслатиб ўтамиз, АҚШ ва Эрон ўртасидаги можаро 28 февралда бошланган. Июнь ойида томонлар ҳарбий ҳаракатларни тўхтатишга қаратилган ўзаро англашув меморандумини имзолаган, бироқ кейинчалик вазият яна кескинлашган.
Ҳозирда Эрон делегацияси Қатарда воситачилар орқали АҚШ билан музокаралар олиб бормоқда. Reuters манбасига кўра, Теҳрон ўзининг ядровий дастури бўйича Вашингтонга таклифлар ҳам тақдим этган.
