Flydubai’даги ҳодиса: Тел-Авивга парвозлар тўхтатилди
Саудия Арабистонининг Табук шаҳрига фавқулодда қўнгандан сўнг авиакомпания рейсларни кейинги хабаргача тўхтатди.
Бирлашган Араб Амирликларининг Flydubai авиакомпанияси 30 сентябрь куни Дубайдан Тел-Авивга учаётган FZ1073 рейсида юз берган хавфсизлик ҳодисасидан сўнг Тел-Авивга парвозларни кейинги хабаргача вақтинча тўхтатди. Бу ҳақда компания бош директори Ғайт ал-Ғайт маълум қилди.
Унинг сўзларига кўра, парвозларни тўхтатиш ваколатли органларнинг илтимосига биноан амалга оширилган. Авиакомпания жамоалари сафар режалари бузилган йўловчиларни қўллаб-қувватлаш ва уларни якуний манзилларига етказиш устида ишламоқда.
30 сентябрь куни Дубайдан Тел-Авивга йўл олган FZ1073 рейси парвоз вақтида юз берган ҳодиса сабаб йўналишини ўзгартириб, Саудия Арабистонининг Табук шаҳридаги аэропортга хавфсиз қўнган. Flydubai барча йўловчилар ва экипаж аъзолари хавфсизлигини тасдиқлаган.
Авиакомпания бош директорининг маълум қилишича, рейс бортидаги 172 йўловчи ва экипаж аъзоларининг барчаси хавфсиз. Ҳодисада жароҳат олган капитан эса тиббий рухсат олганидан сўнг БААга қайтган.
Саудия Арабистони Ички ишлар вазирлиги 1 октябрь куни дастлабки маълумотларни эълон қилиб, ҳодиса парвоз вақтида иккинчи учувчи ва капитан ўртасидаги можаро оқибатида юз берганини билдирган. Натижада икки учувчи ҳам турли даражада жароҳат олган.
Саудия расмийларига кўра, учувчилар соғлиғи яхшилангандан сўнг, БАА хавфсизлик кучлари кузатувида Абу-Дабига олиб кетилган, экипажнинг қолган аъзолари эса аввалроқ Дубайга қайтарилган.
Flydubai ҳодисанинг сабаб ва тафсилотларини аниқлаш бўйича ваколатли органлар томонидан кенг қамровли расмий тергов олиб борилаётганини маълум қилган. Авиакомпания терговга кўмаклашмоқда.
