Қабул-2026: имтиҳондан «йиқилган» қорақалпоғистонлик абитуриентлар учун қўшимча ўринлар ажратилди
Қорақалпоғистонда доимий яшайдиган ёшлар учун 2026/2027-ўқув йилида олий таълимга қўшимча 500 та мақсадли ва 6 500 та тўлов-контракт асосидаги қабул параметрлари тасдиқланди.
2026/2027-ўқув йили учун Қорақалпоғистонда доимий яшайдиган ёшларга олий таълимга киришда иккита қўшимча имконият берилди.
Давлат комиссиясининг тегишли баёнига кўра, 2–6 октябрь кунлари кириш имтиҳонларида 68 ва ундан юқори балл тўплаб, давлат олий таълим ташкилотларининг кундузги таълим шаклига тўлов-контракт асосида талабаликка тавсия этилган ёшлар 500 та мақсадли қабул параметри учун танловда иштирок этиши мумкин.
Бунинг учун Қорақалпоғистон Республикасида доимий яшайдиган, умумий ўрта, ўрта махсус ёки касбий таълим ташкилотини тамомлаган абитуриентлар 2–6 октябрь кунлари my.uzbmb.uz орқали рўйхатдан ўтади. Танлов абитуриент талабаликка тавсия этилган олий таълим ташкилоти ва таълим йўналиши бўйича ўтказилади.
Мақсадли қабулга тавсия этишда абитуриентларнинг кириш имтиҳонларида тўплаган баллари кетма-кетлиги асос қилиб олинади.
Бундан ташқари, Қорақалпоғистон Республикасида доимий яшайдиган ва кириш имтиҳонларида 56,7 ва ундан юқори балл тўплаган, бироқ талабаликка тавсия этилмаган абитуриентлар учун вилоятлардаги давлат олий таълим ташкилотларининг бакалавриат йўналишларига 6 500 та қўшимча қабул параметри ажратилди.
Мазкур қўшимча қабул базавий тўлов-контракт асосида амалга оширилади. Танлов тегишли бакалавриат таълим йўналишлари кесимида ўтказилади.
Танлов қайдномалари 2026 йил 10 октябргача тегишли олий таълим ташкилотларига етказилади.
