Ишдан бўшатилганлар учун янги тартиб: муддатидан олдин пенсия олиш мумкин
Белгиланган ёш ва меҳнат стажига эга бўлиб, ишдан бўшатилган айрим фуқароларга уч ой давомида иш топилмаса, муддатидан олдин ёшга доир пенсия тайинланади.
Айрим ҳолларда меҳнат шартномаси бекор қилинган ва белгиланган иш стажига эга фуқароларга муддатидан олдин ёшга доир пенсия тайинланади.
28 сентябрь куни қабул қилинган 519-сон Ҳукумат қарори билан тасдиқланган маъмурий регламентга кўра, умумий меҳнат стажи 25 йилдан кам бўлмаган 58–60 ёшдаги эркаклар ҳамда камида 20 йиллик иш стажига эга 53–55 ёшдаги аёллар муддатидан олдин ёшга доир пенсия тайинлаш учун тақдимнома расмийлаштириш бўйича Ягона интерактив давлат хизматлари портали орқали мурожаат қилиши мумкин.
Бунинг учун меҳнат шартномаси бекор қилинганлиги ҳақидаги буйруқ нусхаси илова қилинади. Меҳнат стажи тўлиқ рақамлаштирилмаган бўлса, меҳнат дафтарчаси нусхаси ҳам тақдим этилади.
Маҳаллий меҳнат органи тақдим этилган ҳужжатларни икки иш куни ичида текширади. Шундан сўнг мурожаат қилувчи иш қидираётган шахс сифатида рўйхатга олиниб, уч ой давомида унга мақбул иш топиш чоралари кўрилади.
Агар уч ой ичида мақбул иш топилмаса, фуқаро ишсиз деб эътироф этилади ва муддатидан олдин пенсия тайинлаш учун тақдимнома Пенсия жамғармасига юборилади.
Пенсия тайинланганидан сўнг ишсизлик нафақасини тўлаш кейинги ойдан бошлаб тўхтатилади. Мазкур давлат хизматидан фойдаланиш учун тўлов ундирилмайди.
