Кўмир қачон ва қаердан сотилади? «Ўзбеккўмир» расмий маълумот берди
Айни пайтда ҳудудларга кўмирни тақсимлаш ва биржа савдоларига чиқариш ишлари босқичма-босқич амалга оширилмоқда.
2026 йилда аҳоли эҳтиёжлари учун 1 млн 530 минг тонна маҳаллий кўмир етказиб берилиши режалаштирилмоқда. Бу ҳақда «Ўзбеккўмир» АЖ ахборот хизмати маълум қилди.
Ҳозирда кўмирни ҳудудлар кесимида тақсимлаш ва биржа савдоларига чиқариш ишлари босқичма-босқич амалга оширилмоқда. Андижон, Фарғона ва Наманган вилоятлари учун кўмирнинг дастлабки партиялари хусусий тадбиркорлар томонидан биржа орқали харид қилинган.
Айни пайтда шартномаларни расмийлаштириш ҳамда кўмирни тегишли ҳудудларга етказиб бериш ишлари давом этмоқда. Маҳсулот маҳаллий омборларга етказилгач, унинг аҳолига сотилиши mycoal.uz электрон платформаси орқали ташкил этилади.
Платформада кўмир савдоси бошланадиган сана, омбор манзили ва мавжуд маҳсулот миқдори ҳудудлар кесимида эълон қилиб борилади.
Шунингдек, ҳудудларда кўмирга эҳтиёжманд хонадонлар рўйхатини шакллантириш ишлари давом этмоқда.
«Ўзбеккўмир» аҳолига кўмир сотилиши бўйича маълумотларни фақат корхонанинг расмий ахборот манбалари ҳамда mycoal.uz платформасидан олишни тавсия қилди.
