“Бу хабарларни вазир юбормаган”: Олий таълим вазирлигидан огоҳлантириш
Қўнғиротбой Шарипов номидан юборилаётган хабарлар сохта экани маълум қилинди.
Теlegram мессенжери орқали Олий таълим, фан ва инновациялар вазири Қўнғиротбой Шарипов номидан турли шахсларга сохта хабарлар юборилмоқда. Бу ҳақда Олий таълим, фан ва инновациялар вазирлиги ахборот хизмати хабар берди.
Вазирлик маълумотига кўра, мазкур хабарларни Қўнғиротбой Шариповнинг ўзи юбормаган. Шунингдек, хабарларда кўрсатилган Телеграм аккаунти вазирнинг шахсий аккаунти эмас.
Шу муносабат билан фуқаролардан бундай хабарларга ишонмаслик ва уларга жавоб бермаслик сўралди.
Вазирлик, айниқса, фуқароларни телефонларига келадиган тасдиқлаш кодларини ҳеч кимга юбормаслик ёки айтмаслик, шунингдек, шахсий маълумотлар ва ҳужжатларни бегона шахсларга тақдим этмаслик ҳақида огоҳлантирди.
Вазирлик фаолиятига оид расмий маълумотлар фақат унинг расмий ахборот каналлари орқали эълон қилиниши эслатилди.
Фуқаролар номаълум аккаунтлардан келган хабарлар, ҳаволалар ёки маълумот сўровларига эҳтиёткорлик билан ёндашиши ҳамда шахсий маълумотларини ошкор қилмаслиги тавсия этилди.
