Қизларни иш билан алдаб, Туркияга олиб келган: халқаро қидирувдаги аёл ушланди
Одам савдосида гумонланиб қидирувда бўлган аёл Туркияда қўлга олинди.
Ўзбекистон ва Туркия ҳуқуқни муҳофаза қилувчи органлари ҳамкорлигида халқаро қидирувда бўлган шахсларни аниқлаш ва қўлга олиш бўйича тезкор-қидирув тадбирлари давом эттирилмоқда.
Навбатдаги тадбирлар давомида одам савдоси жиноятини содир этганликда айбланиб, узоқ вақтдан буён халқаро қидирувда бўлган Ўзбекистон фуқароси, 1981 йилда туғилган Н.Е. Истанбул шаҳрида аниқланиб, қўлга олинди.
Н.Е. Жиноят кодексининг 135-моддаси 3-қисми — одам савдоси бўйича айбланиб қидирувга берилган.
Тергов маълумотларига кўра, у ёш қизларни юқори маошли иш ваъдалар билан алдаб, Туркияга олиб келиш, уларнинг паспортларини олиб қўйиш ва кейинчалик эксплуатация қилиш билан шуғулланганликда гумон қилинмоқда.
Қўлга олинган шахс белгиланган тартибда Ўзбекистон Республикасининг ваколатли органларига топширилди. Ҳозирда унга нисбатан тегишли тергов ва процессуал ҳаракатлар давом эттирилмоқда.
