Афғонистондан келган юк машинаси текширилди: 52,5 кг наркотик топилди

Сурхондарё вилоятида Афғонистондан Ўзбекистонга йирик миқдордаги гиёҳвандлик воситаларини олиб киришга уриниш фош этилди. Бу ҳақда Божхона қўмитаси раисининг матбуот котиби хабар берди.

 

1 октябрь куни соат 22:30 да Афғонистондан «Айритом» чегара божхона постига кириб келган бўш юк автомобили божхона назоратидан ўтказилган. Текширув вақтида кинология хизмати итининг транспорт воситасига нисбатан белги бериши божхона ходимларида шубҳа уйғотган. Шундан сўнг Термиз туманида истиқомат қилувчи, 1993 йилда туғилган фуқаро бошқарувидаги юк автомобили чуқурлаштирилган божхона назоратидан ўтказилган.

 

Натижада автомобиль тиркамасининг пол қисми остига яширилган 98 дона ўрам аниқланган. Уларнинг 79 тасидан 42 килограмм 335 грамм гашиш, 19 тасидан эса 10 килограмм 260 грамм опий топилган. Шу тариқа ўрамлари билан бирга олиб қўйилган гиёҳвандлик воситаларининг умумий оғирлиги 52 килограмм 595 граммни ташкил этган. Мутахассислар ҳисоб-китобига кўра, мазкур миқдордаги гиёҳвандлик воситалари салкам 340 минг дозага тенг.

 

Мазкур ҳолат божхона ходимлари, Чегара қўшинлари ҳарбий хизматчилари, Давлат хавфсизлик хизмати ҳамда ички ишлар органлари вакиллари ҳамкорлигида аниқланган. Ҳозирда ҳолат юзасидан тегишли процессуал тадбирлар олиб борилмоқда.

 

Маълумот учун, 2026 йилнинг ўтган даврида Ўзбекистон божхона органлари ҳуқуқни муҳофаза қилувчи бошқа идоралар билан ҳамкорликда 1,9 тоннадан зиёд гиёҳвандлик воситаларининг ноқонуний олиб кирилиши ва мамлакат ҳудудидаги яширин айланмасига чек қўйган.