4,25 млн долларлик келишув: банк ходими 100 минг доллар олаётганида қўлга тушди
У 16,05 гектар ер ва ҳокимлик захирасидаги 4 гектар майдонни расмийлаштириб бериш эвазига пул талаб қилган.
Тошкент вилоятида нуфузли банклардан бирининг минтақавий марказида ишловчи бўлим бошлиғи 100 минг АҚШ долларини олаётган вақтида ушланди. Бу ҳақда ДХХ ва Бош прокуратура ҳузуридаги Департамент ҳамкорлигида ўтказилган тезкор тадбир натижаларига кўра маълум қилинди.
Қайд этилишича, банкнинг вилоятдаги минтақавий маркази Маҳаллабай ва давлат дастурлари билан ишлаш бўлими бошлиғи ноқонуний келишувга киришган.
У 2024 йилда Давлат активларини бошқариш агентлигининг ҳудудий бошқармаси томонидан электрон онлайн-аукцион орқали ўзининг отасига чорвачилик мақсадида фойдаланиш учун ижара ҳуқуқи асосида сотилган, Қуйичирчиқ тумани ҳокимлиги балансидаги 16,05 гектар ер майдонини сотиш ҳамда ҳокимлик захирасида бўлган 4 гектар ерни мансабдор танишлари орқали расмийлаштириб беришни ваъда қилган.
Бунинг эвазига у харидордан жами 4 млн 250 минг АҚШ доллари талаб қилган.
Тезкор тадбир давомида банк ходими сўралган маблағнинг 100 минг АҚШ долларини олдиндан олаётган вақтида ашёвий далиллар билан ушланган.
Ҳолат юзасидан унга нисбатан жиноят иши қўзғатилган. Ҳозирда тергов ҳаракатлари олиб борилмоқда.
