Қалбаки пуллар савдоси фош этилди: 297 млн сўмлик банкнотларни 148 млн сўмга сотган шахс ушланди
Унинг уйидан қалбаки банкнотлар тайёрлашда фойдаланилган принтер, махсус қоғозлар ва бошқа ускуналар ҳам топилган.
Давлат хавфсизлик хизматининг Тошкент шаҳар ва Андижон вилояти бўйича бошқармалари ходимлари томонидан ўтказилган тезкор тадбир давомида уй шароитида қалбаки пул тайёрлаш ва уларни муомалага киритиш билан шуғулланган шахс фош этилди.
Аниқланишича, Асака туманида яшовчи, 1987 йилда туғилган, муқаддам фирибгарлик билан боғлиқ жиноят учун судланган фуқаро 100 ва 200 минг сўмлик қалбаки банкнотлардан иборат жами 297 млн сўмлик пулларни шартли харидорга 148 млн сўмга сотган вақтида ашёвий далиллар билан ушланган.
Тезкор тадбир давом эттирилиб, унинг яшаш хонадони кўздан кечирилган. Натижада уйда қалбаки банкнотлар тайёрлашда фойдаланилган компьютер, «Epson» русумли принтер, А4 ҳажмдаги махсус қоғозларга чоп этилган ярим тайёр 50 ва 100 минг сўмлик купюралар ҳамда қоғоз кесувчи ускуналар аниқланиб, процессуал тартибда расмийлаштириб олинган.
Ҳолат юзасидан ДХХ Тошкент шаҳар бўйича бошқармаси томонидан мазкур фуқаро ва бошқаларга нисбатан Жиноят кодексининг 176-моддаси 3-қисми «а» банди билан жиноят иши қўзғатилган.
Ҳозирда тергов ҳаракатлари олиб борилмоқда. Тергов доирасида гумонланувчининг жиноий алоқаларини аниқлаш ҳамда ишга алоқадор бошқа ҳолатларга ҳуқуқий баҳо бериш бўйича зарур чора-тадбирлар амалга оширилмоқда.
