Шаръий никоҳдан кейинги зўравонлик: Олмазорда вояга етмаган қиз ҳимояга олинди
Эркак вояга етмаган қизга нисбатан жинсий зўравонлик қилиб, унга тан жароҳати етказган.
Тошкент шаҳрининг Олмазор туманида вояга етмаган қизга нисбатан зўравонлик ҳолати аниқланди. Бу ҳақда Ижтимоий ҳимоя миллий агентлиги хабар берди.
Маълум қилинишича, дастлабки маълумотларга кўра, Ч.Б. 2025 йил 28 август куни вояга етмаган Н.М. билан шаръий никоҳдан ўтиб, шу кундан буён у билан бирга яшаб келган.
Қайд этилишича, Ч.Б. вояга етмаган қизга нисбатан зўравонлик ишлатиб, жинсий зўравонлик содир этган ҳамда унга тан жароҳати етказган.
Ҳозирда мазкур ҳолат юзасидан Олмазор тумани ИИБ томонидан терговга қадар текширув ишлари олиб борилмоқда.
5 октябрь куни Олмазор туманидаги «Инсон» ижтимоий хизматлар маркази ҳамда туман ИИБ ходимлари вояга етмаган қиз ва унинг аммаси билан суҳбат ўтказган.
Ҳозирда қизнинг ҳуқуқ ва қонуний манфаатларини ҳимоя қилиш, хавфсизлигини таъминлаш ҳамда руҳий ҳолатини барқарорлаштириш бўйича зарур чоралар кўрилмоқда.
Шунингдек, келгусида тазйиқ ва зўравонлик ҳолатларининг олдини олиш мақсадида вояга етмаган Н.М.га ҳимоя ордери расмийлаштирилган.
