«Бундай ҳаракатлар зудлик билан тўхтатилиши шарт»: Ўзбекистон Ар-Риёд аэропортига қилинган ҳужумни қатъий қоралади

Ўзбекистон Ташқи ишлар вазирлиги Ар-Риёд шаҳридаги Подшоҳ Холид номидаги халқаро аэропортга ҳусийлар томонидан уюштирилган ҳужумни қатъий қоралади. Бу ҳақда вазирликнинг расмий баёнотида маълум қилинди.

 

Вазирлик ҳалок бўлганларнинг оила аъзолари ва яқинларига таъзия билдириб, жароҳатланганларга ҳамдардлик изҳор этди ҳамда уларнинг тезроқ соғайиб кетишини тилади.

 

Баёнотда Ўзбекистон Саудия Арабистони суверенитети, ҳудудий яхлитлиги ва хавфсизлигини қатъий қўллаб-қувватлаши таъкидланган.

 

Шунингдек, тинч аҳоли ва фуқаролик инфратузилмаси объектларига ҳужумлар халқаро ҳуқуқ нормаларининг жиддий бузилиши экани қайд этилган. Вазирлик бундай ҳужумларни тўхтатишга, барча томонларни вазминлик кўрсатишга ва кескинликнинг янада кучайишига йўл қўймасликка чақирган.

 

Ўзбекистон келишмовчиликларни халқаро ҳуқуқ нормалари ва БМТ Низоми тамойилларига мувофиқ, мулоқот ҳамда дипломатик воситалар орқали ҳал этиш тарафдори эканини билдирган.

 

Вазирлик баёнотида Ўзбекистон Саудия Арабистони халқи ва ҳукумати билан бирдамлигини изҳор этиб, минтақада тинчлик, барқарорлик ва хавфсизликни мустаҳкамлашга содиқлигини яна бир бор тасдиқлаган.