20 минг хонадон, 55 минг ўринли стадион: Янги Тошкентда қандай режалар бор?

 

Президент Шавкат Мирзиёев Янги Тошкент қурилишини жадаллаштириш масалалари юзасидан инвестор ва тадбиркорлар билан очиқ мулоқот қилмоқда.

 

Давлат раҳбари сўнгги бир ой давомида тадбиркорлар билан ўтказилган учрашувларда билдирилган таклифлар, ер ажратиш, рухсат олиш ва тўловлар билан боғлиқ муаммолар ўрганилганини таъкидлади.

 

Йил охиригача Янги Тошкентда 20 минг хонадонни фойдаланишга топшириш режалаштирилган. Бу камида 70 минг киши учун янги яшаш муҳитини яратишни англатади.

 

Президент аҳолининг эҳтиёжларини ҳисобга олиб, уй-жойлар билан бир вақтда дам олиш, спорт, савдо, таълим ва тиббиёт хизматлари учун зарур инфратузилмани ҳам ташкил этиш муҳимлигини таъкидлади.

 

Янги Тошкентда ФИФА талабларига жавоб берадиган 55 минг ўринли стадион ҳам қурилмоқда. У келаси йили 20 ёшгача бўлган футболчилар ўртасидаги жаҳон чемпионатининг асосий ареналаридан бири бўлади.

 

Шу муносабат билан ташриф буюрувчилар учун меҳмонхоналар, кафе, ресторан ва кўнгилочар масканларга бўлган эҳтиёжни аниқ ҳисоблаб чиқиш ҳамда бу маълумотларни тадбиркорларга очиқ тақдим этиш вазифаси қўйилди.

 

Янги Тошкентнинг ишбилармонлик муҳитини шакллантиришда давлат идораларини янги ҳудудга кўчириш ҳам муҳим аҳамиятга эга. Ҳозирда Қурилиш, Транспорт ва Энергетика вазирликлари енгил конструкцияли биноларда фаолият юритмоқда. Шунингдек, вазирлик ва идораларнинг 2,6 минг нафар ходимига мўлжалланган 9 та бино қурилмоқда.

 

Бош вазирга қолган вазирликлар ва давлат ташкилотларини ҳам Янги Тошкентга кўчириш ишларини бошлаш топширилди.

 

Зарур ҳолларда давлат ташкилотларининг пойтахтдаги мавжуд биноларини бузиб, қайта қуриш ҳуқуқисиз, фақат жорий таъмирлаш ва фойдаланиш шарти билан сотиш масаласи ҳам кўриб чиқилади.