15 ёшгача — тақиқ, 18 ёшгача — чеклов: Туркия ижтимоий тармоқлар учун янги қоидаларни жорий этади
Ёши 15 дан кичик экани аниқланган фойдаланувчиларнинг аккаунтлари ёпилади.
Туркияда 15 ёшга тўлмаган болаларга ижтимоий тармоқлар хизмат кўрсатиши тақиқланади. Янги тартиб 2026 йил 1 ноябрдан кучга киради. Тегишли низом 10 октябрь куни мамлакатнинг расмий ҳукумат газетасида эълон қилинди.
Ҳужжатга кўра, ижтимоий тармоқ платформалари фойдаланувчиларнинг ёшини текшириши шарт. Бунда ёшни тасдиқлаш жараёнида шахсий маълумотларни ҳимоя қилиш талабларига риоя этилиши, фойдаланувчининг айнан ёш мезонига мос келишини аниқлаш билан чекланиш кўзда тутилган.
15 ёшга тўлган, бироқ 18 ёшдан кичик фойдаланувчилар учун алоҳида хизмат режими жорий этилади. Уларнинг аккаунтларида махфийлик созламалари сукут бўйича ёқилган бўлиши, жонли эфир ва шахсийлаштирилган рекламадан фойдаланиш чекланиши белгиланган. Шунингдек, болалар аккаунтларининг обуначилари ва обуна бўлган саҳифалари рўйхатини бошқа фойдаланувчилар кўра олмайди.
Фойдаланувчиларнинг ёшини тасдиқлаш e-Devlet давлат хизматлари тизими орқали амалга оширилади. Аввалдан очилган аккаунтлар бўйича ёшни текшириш жараёни 2027 йил 31 мартгача якунланиши керак. Ёши 15 дан кичик экани аниқланган фойдаланувчиларнинг аккаунтлари ёпилади.
Янги қоидалар ота-оналар ва васийлар назоратини ҳам кучайтиради. Ижтимоий тармоқлар уларга болаларнинг аккаунт созламаларини бошқариш, фойдаланиш вақтини чеклаш ва пулли амалиётларни назорат қилиш имконини берувчи воситаларни тақдим этиши шарт.
Мазкур тартиб болаларнинг интернетдаги хавфсизлигини кучайтириш ва уларнинг шахсий маълумотларини ҳимоя қилишга қаратилган.
