Истанбулдаги сув тошқинлари: қурбонлар сони тўрт кишига етди

Туркиянинг Истанбул шаҳрида кучли ва узлуксиз ёмғир оқибатида юзага келган сув тошқинлари қурбонлари сони тўрт кишига етди.

«Анадолу» агентлиги хабарига кўра, ҳалок бўлганлардан бири Истанбулнинг Бейкоз туманидаги мактаб қурилишида ишлаган. У кучли ёмғирдан кейин сувга тўлган қудуқни бўшатишга уринаётганда мувозанатини йўқотиб, қудуққа тушиб кетган. Эркак шифохонага етказилган, бироқ шифокорлар унинг ҳаётини сақлаб қола олмаган.

Сўнгги уч кун ичида қутқарув хизматлари 3 057 кишини эвакуация қилиб, хавфсиз жойларга олиб борган.

Истанбул губернатори Довут Гулнинг маълум қилишича, чоршанба куни шаҳарда ҳар квадрат метрга 261 миллиметр ёғингарчилик қайд этилган. Бу шаҳарнинг замонавий тарихидаги энг юқори кўрсаткич ҳисобланади. Пайшанба куни ҳам айрим ҳудудларда кучли ёмғир давом этган.

Синоптиклар жума кунидан бошлаб Истанбулда яна кучли ёғингарчилик кузатилишини, шанба куни эса ёғин миқдори ҳар квадрат метрга 60 миллиметрга етиши мумкинлигини прогноз қилган.

Кучли ёғингарчилик Туркиянинг бошқа ҳудудларига ҳам таъсир кўрсатган. Истанбулдан ташқари Зонгулдак, Ялова, Кожаэли, Дюздже ва Сакария вилоятларидаги таълим муассасаларида дарслар тўхтатилган.