Фарзанд тарбиясидаги масъулиятсизлик: ота-оналарни қандай жазо кутмоқда?

 

Ўзбекистонда болаларни тарбиялаш ва уларга ғамхўрлик қилиш мажбуриятларини бажармаганлик учун маъмурий жавобгарлик кучайтирилди. Бу болаларни зўравонликнинг барча шаклларидан ҳимоя қилиш тизимини такомиллаштиришга қаратилган қонунда белгиланган.

 

Қонунга кўра, ота-оналар ёки уларнинг ўрнини босувчи шахслар вояга етмаган болаларни тарбиялаш мажбуриятларини бажармаса, жумладан, уларнинг маъмурий ҳуқуқбузарлик содир этишига сабаб бўлса, жавобгарликка тортилиши мумкин.

 

Шунингдек, зарур имкониятларга эга бўлган ота-оналар боланинг асосий эҳтиёжларини қасддан қондирмаслиги оқибатида унинг соғлиғи, жисмоний, ақлий ёки ахлоқий ривожланишига зарар етса ҳам жавобгарлик белгиланади.

 

Мазкур ҳуқуқбузарлик учун жарима базавий ҳисоблаш миқдорининг 5 бараваридан 10 бараваригача этиб белгиланди. Кодекснинг 47-моддасидаги бошқа ҳуқуқбузарликлар учун ҳам жарималар оширилди: ота-оналар ёки васийлар томонидан мажбурий умумий ўрта, ўрта махсус ёки касб-ҳунар таълимини тугатишга тўсқинлик қилиш 15 дан 20 БРВ гача жарима солишга сабаб бўлади. Такрорланган ҳуқуқбузарлик 20 дан 30 БРВ гача жарима ёки айрим ҳолатларда 15 суткагача маъмурий қамоқ жазоси ҳам қўлланиши мумкин. Вояга етмаганларни қаровсиз қолдириш учун 5 дан 10 БРВ гача жарима солинади.

 

Қонун болаларнинг ҳуқуқ ва манфаатларини ҳимоя қилиш ҳамда ота-оналарнинг масъулиятини оширишга қаратилган.