Шар сабаб электр узилди: тўртта туман электрсиз қолди
Барча истеъмолчиларга электр энергияси етказиб бериш 33 дақиқада тўлиқ тикланди.
19 октябрь куни Тошкентнинг тўртта тумани айрим ҳудудларида кузатилган электр таъминотидаги узилиш ҳавода учиб келган шар “Акса Тошкент” иссиқлик электр станциясининг очиқ тақсимлаш қурилмасига тушиши оқибатида юзага келган. Барча истеъмолчиларнинг электр таъминоти соат 19:38 да тўлиқ тикланган.
Энергетика вазирлиги маълумотига кўра, ҳодиса соат 19:05 да Қибрай туманида жойлашган станцияда содир бўлган. Натижада ҳимоя тизими ишга тушиб, электр станцияси қуввати 460 МВтдан 185 МВтгача камайган.
Бунинг оқибатида Юнусобод, Олмазор, Мирзо Улуғбек ва Шайхонтоҳур туманларининг айрим ҳудудларида электр таъминотида вақтинча узилиш кузатилган.
Кўрилган тезкор чоралар натижасида соат 19:09 да Юнусобод ва Олмазор туманларида электр таъминоти қисман тикланган. Соат 19:25 да захира манбалар орқали таъминот тўлиқ тикланган, 19:38 га келиб эса барча истеъмолчиларга электр энергияси етказиб бериш қайта йўлга қўйилган.
Вазирлик фуқаролардан электр станциялари, подстанциялар ва бошқа электр қурилмалари яқинида ҳавога шар учирмасликни сўради. Бундай ҳолатлар электр таъминотида узилишларга сабаб бўлиши мумкин.
