Эркинжон Турдимовга яна бир ваколат берилди: вазирликка ходимларни суҳбат асосида ишга олиши мумкин
Президент қарори билан Таълим ва илм-фан вазирлигида янги фаолият ва тузилмалар ташкил этилади.
Таълим ва илм-фан вазири Эркинжон Турдимовга 2027 йил 1 февралга қадар вазирлик марказий аппаратига ходимларни тўғридан-тўғри суҳбат асосида ишга қабул қилиш ваколати берилди. Бу Президентнинг 19 октябрь куни имзоланган “Таълим ва илм-фан вазирлиги фаолиятини ташкил этиш чора-тадбирлари тўғрисида”ги қарорида белгиланган.
Қарорга кўра, Таълим ва илм-фан вазирлиги таълим, илм-фан ва илмий фаолият соҳасидаги ваколатли республика ижро этувчи ҳокимият органи ҳисобланади.
Вазирлик фаолиятида аутсорсинг асосида иккита фаолият ташкил этилади. Жумладан, аҳоли мурожаатлари, шикоятлари, таклифлари ва эътирозларини қабул қилиш, уларни тезкор кўриб чиқиш ҳамда тегишли ташкилотларга йўналтириш учун “Call-марказ” фаолияти йўлга қўйилади.
Шунингдек, аҳоли ва таълим-илм-фан тизими ходимлари билан мунтазам мулоқот қилиш, таълим хизматлари сифати ва оммабоплиги ҳамда мавжуд муаммолар ҳақида тезкор ахборот олиш ва уларни таҳлил қилиш мақсадида қайта алоқа тизими жорий этилади.
Вазир ҳузурида таълим олувчилар, талабалар, ота-оналар, педагоглар ва иш берувчилар вакилларидан иборат Таълим бўйича жамоатчилик кенгаши ташкил этилади.
Вазирлик ҳайъати эса вазир, унинг ўринбосарлари, вазирлик ҳузуридаги агентликлар директорлари, етакчи олий таълим ташкилотлари ректорлари, олимлар ва педагоглар орасидан шакллантириладиган 15 нафар аъзодан иборат бўлади.
Қарорда инсон капиталини ривожлантириш ва таълим тизимини такомиллаштиришга қаратилган бир қатор ташкилий чоралар ҳам белгиланган. Унга кўра:
- Президент Администрацияси ҳузурида Инсон капиталини ривожлантириш ва узлуксиз таълим стратегиясини ишлаб чиқиш бўйича махсус ишчи гуруҳ ташкил этилади;
- вазирлик ҳузурида Инсон капиталини ривожлантириш жамғармаси тузилади;
- вазирлик ҳузурида Таълим ва илм-фан бўйича стратегик тадқиқотлар ва баҳолаш маркази ташкил этилади;
- Билим ва малакаларни баҳолаш агентлиги Таълим ва илм-фан вазирлиги ҳузурида ташкил қилинади;
- Мактабгача ва мактаб таълими вазирлиги ҳузуридаги Таълимни ривожлантириш маркази фаолияти тугатилади.
Эслатиб ўтамиз, аввалроқ Бош вазирнинг таълим, илм-фан ва соғлиқни сақлаш масалалари учун масъул биринчи ўринбосари — Таълим ва илм-фан вазири Эркинжон Турдимовга бириктирилган республика ва маҳаллий ижро этувчи ҳокимият органлари ҳамда бошқа ташкилотлар рўйхати маълум бўлганди.
