Экостикер олмаган ҳайдовчилар жаримага тортиладими? ЙҲХХ муносабат билдирди
Ижтимоий тармоқларда экостикер олмаган ҳайдовчилар 4,4 миллион сўм жаримага тортилиши ҳақида хабарлар тарқалди.
Ижтимоий тармоқларда 1 январдан бошлаб экологик стикер олмаган ҳайдовчиларга базавий ҳисоблаш миқдорининг 10 баравари миқдорида, яъни 4,4 миллион сўм жарима қўлланилиши ҳақида хабарлар тарқалди. Шунингдек, янги йилдан экологик стикерлар пулли бўлиши ҳақида ҳам маълумотлар эълон қилинди.
Ички ишлар вазирлиги Йўл ҳаракати хавфсизлиги хизмати мазкур хабарларга муносабат билдириб, уларни тасдиқловчи қонуний асослар мавжуд эмаслигини маълум қилди.
Хизматнинг билдиришича, ижтимоий тармоқларда тарқалаётган экостикер олмаган ҳайдовчиларни жаримага тортиш ва экологик стикерларни пулли қилиш ҳақидаги маълумотлар амалдаги қонунчиликка асосланмаган.
ЙҲХХ фуқароларни йўл ҳаракати хавфсизлигига оид маълумотларни фақат ваколатли идораларнинг расмий ахборот манбаларидан олишга чақирди.
