Жиззахда боғча мудираси ўлдирилди: эри гумонланувчи сифатида ушланди
Аёлнинг ўлими юзасидан тергов ҳаракатлари олиб борилмоқда.
Жиззах вилояти Зарбдор туманида боғча мудираси вафот этгани юзасидан қасддан одам ўлдириш моддаси билан жиноят иши қўзғатилди. Бу ҳақда Бош прокуратура матбуот котиби Ҳаёт Шамсутдинов Zamon.uz'га маълум қилди.
Дастлабки маълумотларга кўра, 29 октябрь куни Зарбдор тумани Янги Ҳаёт маҳалласида яшовчи Ф. исмли аёлга суиқасд қилинган ва оқибатда у вафот этган. Марҳума туманнинг Адиробод маҳалласи ҳудудидаги мактабгача таълим ташкилотида мудира лавозимида ишлаган.
Ҳодиса юзасидан 2026 йил 29 октябрь куни туман прокуратураси томонидан Жиноят кодексининг 97-моддаси 1-қисми билан жиноят иши қўзғатилган.
Жиноятга алоқадорликда гумон қилинаётган шахс Жиноят-процессуал кодексининг 221-моддаси тартибида ушланган.
Ҳодиса оилавий можаро билан боғлиқ бўлиши мумкинлиги, аёлнинг турмуш ўртоғи жиноятга алоқадорлиги ҳақидаги маълумотлар тарқалган. Бироқ бу тафсилотлар ҳозирча расмий равишда тасдиқланмаган.
