Сувдан қарзи бор истеъмолчиларнинг электр тўловлари чекланадими? Янги тартиб маълум қилинди
Янги тартиб 2027 йил 1 январдан кучга киради.
Ўзбекистонда ичимлик суви таъминоти ва канализация хизматлари учун қарздорликни ундириш тартиби 2027 йил 1 январдан ўзгаради. Бу ҳақда «Ўзсувтаъминоти» матбуот хизмати маълум қилди.
Янги тартибга кўра, белгиланган муддатда тўланмаган қарзлар миқдорига қараб нотариал ёки суд тартибида ундирилади. Жумладан, 1 000 та ҳисоблаш бирлигигача бўлган қарзлар нотариал тартибда, ушбу миқдордан ошадиган қарзлар эса суд орқали ундирилади.
Шундан сўнг тегишли ижро ҳужжатлари тайёрланиб, Мажбурий ижро бюросига юборилади. Агар ижро ҳужжатлари расмийлаштирилганидан кейин ҳам истеъмолчи ўз мажбуриятларини белгиланган тартибда бажармаса, қонунчиликка мувофиқ, унинг электр энергияси учун тўловларни амалга ошириш имконияти чекланиши мумкин.
Бунда истеъмолчи электр энергияси учун тўловларни амалга ошириш имкониятини қайта тиклаши учун ичимлик суви ва канализация хизматлари бўйича қарздорлигини тўлаши керак бўлади.
«Ўзсувтаъминоти» қарздорлик юзага келиши билан электр энергияси учун тўловларни амалга ошириш имконияти дарҳол чекланмаслигини алоҳида таъкидлади. Истеъмолчига қарзни тўлаш учун етарли вақт берилади. Чеклов фақат қарздорлик белгиланган тартибда ундирилмаган ва ижро ҳужжатлари бўйича мажбуриятлар бажарилмаган тақдирда қўлланади.
