Бу ҳақда АОКАда ўтказилган матбуот анжуманида Монополияга қарши курашиш қўмитаси раиси ўринбосари Фаррух Карабаев маълум қилди.
У қуйидагича фикр билдирди: “Бензин нархларига таъсир қилувчи омиллар ўрганилди, кўрсатмалар берилди, чоралар кўриляпти. Бу бўйича идоралараро ишчи гуруҳ ишлаяпти. Қаерда бозор механизмлари асосида табиий ўсишга эришилган бўлса, биз унга таъсир кўрсата олмаймиз. Лекин сунъий равишда юзага келтирилган, келишиб қилинган, манипуляция ҳаракатларига таъсир кўрсатиш мумкин”.
Бундан ташқари, анжуманда бензин нархини барқарорлаштириш, тушириш бўйича ҳаракатлар давом этаётгани, бу вақт талаб қиладиган масала эканлиги, аммо яқин кунларда нархларда сезиларли ўзгариш бўлиши ҳам таъкидланди.
Айни пайтда бу борада бозорни тўйинтириш, арзон нархлар асосида кичик харидорларга имконият бериш масаласига эътибор қаратилмоқда.
Бунинг асосий сабаи йирик, улгуржи харидорлар жуда кичик рентабелликка ишлайди, уларнинг савдо жараёнида баландроқ таклиф бериш имкони кўпроқ эканлиги ойдинлашди.Натижада, лотлар кичик ҳажмда қилинаётгани, бундан мақсад — оддий АЁҚШларнинг бензинни олиши ва захирасини тўлдиришига имконият яратилаётгани ҳам маълум бўлди.
Бу эса нархлар сунъий равишда кўтарилишининг олдини олишга ёрдам беради.
Эслатиб ўтамиз, аввалроқ Ўзбекистонда бензин нархи йил бошидан буён 17 фоизга қимматлашгани ҳамда Ўзбекистонда бензин нархи ошгани ҳақида хабар берилганди.
Чўлпоной Аҳмедова